മീൻ പൊള്ളിച്ചത്

മീൻ പൊള്ളിച്ചത്:
——————
ആവശ്യമുള്ള ചേരുവകകൾ:
—————————–
1 ) മീഡിയം വലുപ്പമുള്ള പരന്ന മീൻ – രണ്ടെണ്ണം (കരിമീനും, ആവോലിയും ഒക്കെയാ രുചി കൂടുതൽ എങ്കിലും ഏതു മീനും പൊള്ളിച്ചെടുക്കാം)
2 ) സവാള ചെറിയ ചതുര കഷ്ണങ്ങളായീ മുറിച്ചത് – രണ്ടു മീഡിയം വലുപ്പമുള്ളതു
3 ) ചെറിയുള്ളി ചെറുതായി അരിഞ്ഞത് – സവാളയ്ക്കു തുല്യം
4 ) തക്കാളി ചെറിയ ചതുര കഷ്ണങ്ങളായി മുറിച്ചത് – ഒന്നര തക്കാളി മീഡിയം വലുപ്പത്തിൽ
5 ) ഇഞ്ചി വെളുത്തുള്ളി പേസ്റ്റ് – ഒരു ടേബിൾ സ്പൂൺ
6 ) പച്ചമുളക് ചെറുതായി അരിഞ്ഞത് – ഒരു ടേബിൾ സ്പൂൺ
7 ) കറിവേപ്പില ചെറുതായി അരിഞ്ഞത് – ഒരു ടേബിൾ സ്പൂൺ
8 ) കട്ടിയുള്ള, തേങ്ങയുടെ ഒന്നാം പാൽ – ഒരു കപ്പ്
9 ) പച്ചമാങ്ങാ ഗ്രേറ്റ് ചെയ്തത് – ഒരെണ്ണത്തിന്റെ മൂന്നിലൊന്നു (ഇതിനു നല്ല മൂത്ത പുളി കുറവുള്ള മാങ്ങയാണ് രുചി)
10 ) മുളക് പൊടി – രണ്ടു ടേബിൾ സ്പൂൺ (എരിവ് അനുസരിച്ചു)
11 ) മല്ലിപൊടി – അര ടേബിൾ സ്പൂൺ
12 ) പെരുംജീരകം പൊടിച്ചത് – അര റ്റീസ്പൂൺ
13 ) മഞ്ഞൾ പൊടി – അര റ്റീസ്പൂൺ
14 ) ഉലുവ പൊടി – കാൽ റ്റീസ്പൂൺ
15 ) ഉപ്പു – ആവശ്യത്തിന്
16 ) വെളിച്ചെണ്ണ – ആവശ്യത്തിന്
17 ) വാഴയില – രണ്ടെണ്ണം വാട്ടിയെടുത്തത്; കെട്ടാനുള്ള വാഴനാരുകളും

തയ്യാറാക്കുന്ന വിധം:
———————-
1 ) ആദ്യം വൃത്തിയാക്കിയ മീൻ നന്നായി കത്തി കൊണ്ട് വരഞ്ഞു ഒരു ടേബിൾ സ്പൂൺ മുളക് പൊടിയും, കാൽ റ്റീസ്പൂൺ മഞ്ഞൾ പൊടിയും കാൽ റ്റീസ്പൂൺ പെരുംജീരകം പൊടിയും ഉപ്പും പകുതി ഇഞ്ചി വെളുത്തുള്ളി പേസ്റ്റും കൂടി മിക്സ് ആക്കി മീനിൽ തേച്ചു പിടിപ്പിച്ചു അരമണിക്കൂർ വയ്ക്കുക; അതിനു ശേഷം ഒരു പാനിൽ വെളിച്ചെണ്ണ ഒഴിച്ച് വറുത്തു വയ്ക്കുക (നന്നായി മൊരിഞ്ഞു പോകരുത്.. മീഡിയം ആയി വറുക്കാൻ പാടുള്ളു)
2 ) മീൻ വറുത്ത അതെ വെളിച്ചെണ്ണയിൽ സവാളയും ചെറിയുള്ളിയും ഇളം ബ്രൗൺ ആകുന്നതു വരെ വഴറ്റുക; ഇതിലേക്ക് ഇഞ്ചി വെളുത്തുള്ളി പേസ്റ്റ് ചേർത്ത് ഒന്ന് മൊരിയുന്നതു വരെ വഴറ്റുക; ഇതിലേക്ക് പച്ചമുളകും കറിവേപ്പിലയും അരിഞ്ഞത് ചേർത്ത് നന്നായി വഴറ്റി അതിലേക്കു മുളക് പൊടിയും, മഞ്ഞൾ പൊടിയും, പെരുംജീരകം പൊടിയും ചേർത്ത് മൂത്തു വരുമ്പോൾ അതിലേക്കു ഉലുവപ്പൊടി ചേർത്ത് ഇളക്കുക
3 ) ഇതിലേക്ക് ഗ്രേറ്റ് ചെയ്തു വച്ച മാങ്ങയും തക്കാളിയും ചേർത്ത് മൂടി വച്ച് അഞ്ചു മിനിറ്റ് വേവിച്ചു; പിന്നെ തുറന്നു വച്ച് ഉടഞ്ഞു തുടങ്ങുന്ന പരുവം വരെ വഴറ്റുക
4 ) ഇതിലേക്ക് തേങ്ങാപാൽ ചേർത്ത് ഇളക്കി തിളച്ചു വരുമ്പോൾ ഉപ്പും മസാലയും എരിവും നോക്കുക; ആവശ്യമെങ്കിൽ ചേർക്കുക; മസാലയുടെ രുചി കൂടി ഇമ്പാലൻസ് തോന്നിയാൽ ഒരു നുള്ളു പഞ്ചസാര ചേർക്കുക; എല്ലാം ബാലൻസ് ആകും; തിളച്ചു ഒന്ന് കുറുതായി വരണം; നല്ല തിക്ക് ആയാൽ ഓഫ് ചെയ്യാം
5 ) ഇനി തീയിൽ വാട്ടിയെടുത്ത വാഴയില എടുത്തു കുറച്ചു മസാല നിരത്തി അതിനു മുകളിൽ വറുത്ത മീൻ ഒരെണ്ണം വച്ച് അതിനു മുകളിൽ മസാല വീണ്ടും നിരത്തി; മീനിനെ മസാല കൊണ്ട് പൊതിയണം; എന്നീട്ടു ഇല മടക്കി പൊതി പോലെ ആക്കി വാട്ടിയ വാഴനാര് കൊണ്ട് കെട്ടി വയ്ക്കുക;
6 ) ഇനിയൊരു പാൻ വച്ച് അല്പം വെളിച്ചെണ്ണ തൂവി അതിൽ വാഴയിലയിൽ പൊതിഞ്ഞു കെട്ടി വച്ചിരിക്കുന്ന മീൻ വച്ച് തിരിച്ചും മറിച്ചും ഇട്ടു ഇല നന്നായി മൊരിഞ്ഞു വരുന്നത് വരെ പൊള്ളിച്ചെടുക്കുക; നന്നായി ചൂടാറിയ ശേഷം കഴിക്കുക

വളരെ സ്വാദിഷ്ടമായ മീൻ പൊള്ളിച്ചത് റെഡി.